అరటికాయ కోఫ్తా వండటం తెలుగులో

కోఫ్తా కోసం: అరటికాయలు – నాలుగు, బంగాళదుంపలు – రెండు, సెనగపిండి – నాలుగు టేబుల్‌స్పూన్లు, జీలకర్ర పొడి – ఒక టీస్పూన్‌, గరంమసాలా – అర టీస్పూన్‌, ఉప్పు – రుచికి తగినంత, నూనె – తగినంత.

గ్రేవీ కోసం: ఉల్లిపాయలు – రెండు, వెల్లుల్లి రెబ్బలు – నాలుగు, అల్లం ముక్క – చిన్నది, టొమాటోలు – రెండు, ఆవాల నూనె – 5 టేబుల్‌స్పూన్లు, బిర్యానీ ఆకులు – రెండు, లవంగాలు – నాలుగు, యాలకులు – నాలుగు, పంచదార – ఒక టీస్పూన్‌, కారం – రెండు టీస్పూన్‌, పసుపు – చిటికెడు, ఉప్పు – తగినంత, ఎండు మిర్చి – రెండు, జీలకర్ర – ఒక టీస్పూన్‌, మెంతులు – ఒక టీస్పూన్‌, ధనియాలు – నాలుగు టేబుల్‌స్పూన్లు, సోంపు – ఒక టీస్పూన్‌, నెయ్యి – ఒక టీస్పూన్‌.

మసాలా దినుసులన్నింటినీ మిక్సీలో వేసి, గ్రైండ్‌ చేసి పెట్టుకోవాలి. అరటికాయలను శుభ్రంగా కడిగి, బంగాళదుంపలతో కలిపి కుక్కర్‌లో వేసి ఉడికించుకోవాలి. తరువాత అరటికాయలు, బంగాళదుంపల పొట్టు తీసి, మెత్తగా చిదుముకోవాలి. వీటిపై జీలకర్ర పొడి, మసాల పొడి చల్లి కలపాలి. సెనగపిండి వేసి మెత్తగా అయ్యేలా కలపాలి. ఇప్పుడు చిన్న చిన్న ఉండలుగా చేసుకొని నూనెలో వేగించాలి. గ్రేవీ తయారీ ఉల్లిపాయలు, అల్లం, వెల్లుల్లి రెబ్బలు, ఒక టీస్పూన్‌ ఆవాల నూనె వేసి పేస్టులా తయారు చేసుకోవాలి.

ఒక పాన్‌ తీసుకొని ఆవాల నూనె వేసి కాస్త వేడి అయ్యాక బిర్యానీ ఆకు, పంచదార వేయాలి. లవంగాలు, దంచిన యాలకులు, ఉల్లిపాయ, అల్లం పేస్టు వేసి వేయించాలి.

కారం, పసుపు, ఉప్పు, మసాల పొడి వేసి కలపాలి. టొమాటో ముక్కలు వేసి కొన్ని నీళ్లుపోసి ఐదు నిమిషాలు పాటు ఉడికించాలి. తరువాత వేగించి పెట్టుకున్న కోఫ్తాలు వేసి మరో రెండు నిమిషాల పాటు వేయించాలి. టీస్పూన్‌ నెయ్యి, అర టీస్పూన్‌ గరంమసాలా వేసి మరికాసేపు ఉడికించాలి. కొత్తిమీరతో గార్నిష్‌ చేసుకొని దింపుకోవాలి. ఈ కర్రీ రోటీ లేదా అన్నంతో తింటే రుచిగా ఉంటుంది.